მკერდის აუგმენტაცია (გადიდება)

ზოგადი მიმოხილვა

მკერდის აუგმენტაცია არის ქირურგიული პროცედურა, რომელიც ტარდება მცირე ზომის მკერდის გასადიდებლად. მკერდის სასურველი ზომის მისაღებად იმპლანტს ათავსებენ სარძევე ჯირკვლის ან მკერდის კუნთების ქვეშ. მკერდის ზომისა და ფორმის ნაკლოვანების არსებობის შემთხვევაში, იმავე პროცედურაში შეიძლება ჩატარდეს მასტოპექსია (მკერდის აწევა) და სხვა რეკონსტრუქციული ოპერაციები.
თუ თქვენ გადაწყვეტილი გაქვთ მკერდის გადიდება, კონსულტაცია უნდა გაიაროთ პლასტიკურ ქირურგებთან ტექნიკის, მოლოდინების, შესაძლო რისკების, იმპლანტის ზომისა და ფორმის შესახებ.

რა დროს ტარდება მკერდის აუგმენტაცია?

ქალები ამ ოპერაციას მიმართავენ, რათა მიაღწიონ მკერდის სასურველ ზომასა და ფორმას. სხვა შემთხვევაში, როდესაც ძუძუს კიბოს გამო ტარდება ცალმხრივი ან ორმხრივი მასტექტომია, იმპლანტირების პროცედურას მიმართავენ რეკონსტრუქციული და კოსმეტიკური მიზნებისთვის.
ამრიგად, მკერდის გადიდების ოპერაცია ტარდება შემდეგ სიტუაციებში:

•    მკერდის მცირე ზომა

•     ასიმეტრია

•    ცალმხრივი ან ორმხრივი მასტექტომია

•    ასაკის მატების, წონის კლების და მშობიარობის მსგავსი ფიზიოლოგიური პროცესების შედეგად მკერდის ფორმისა და ზომის ცვლილება.

ყველაზე რეალისტური და დამაკმაყოფილებელი შედეგების მისაღებად, კონსულტაცია უნდა გაიაროთ პლასტიკურ ქირურგთან.

რისკები

მიუხედავად მედიცინის განვითარებისა, რისკების სრულად თავიდან აცილება შეუძლებელია. მკერდის გადიდების ოპერაციის პოტენციური რისკები ჩამოთვლილია ქვემოთ.

•    მგრძნობელობის დაკარგვა მკერდის არეში ერთ, ან ორივე მხარეს. იგი როგორც წესი დროებითია და გაივლის 6-12თვის ვადაში.
•    იმპლანტის პერფორაცია ან გაჟონვა
•    ტკივილი
•    კელოიდური ნაწიბურის წარმოქმნა. მიუხედავად იმისა, რომ ნაწიბუროვანი ქსოვილის წარმოქმნა მოსალოდნელია ყველა ქირურგიულ პროცედურაში, იმპლანტის ირგვლივ კელოიდურმა ნაწიბურმა შეიძლება გააუარესოს მკერდის ვიზუალური მხარე.
•    ინფექცია
•    სიმეტრიის დარღვევა

პროფესიონალი ქირურგების გუნდი მიმართავს ყველა ზომას გართულებების რისკის მინიმუმამდე შესამცირებლად. ისინი ოპერაციამდე პაციენტს აწვდიან ინფორმაციას ზემოთ ჩამოთვლილი რისკებისა და გართულებების შესახებ და ეხმარებიან შიშის და სტრესის დაძლევაში.

მოსამზადებელი პერიოდი

წინა მოსამზადებელი პერიოდი მედიკანას ყველა საავადმყოფოსთვის საერთოა.
მკერდის პლასტიკური ოპერაციის ჩატარებაზე გადაწყვეტილების მიღების და პლასტიკურ ქირურგთან კონსულტაციის შემდეგ უნდა გატარდეს ქვემოთ ჩამოთვლილი ღონისძიებები:

•    ჯანმრთელობის ისტორიის შესწავლა
•    დეტალური ფიზიკური გამოკვლევა
•    ოპერაციის თანმხლები რისკების შეფასებისთვის საჭირო ანალიზები
•    ანესთეზიოლოგის კონსულტაცია და ანესთეზიასთან დაკავშირებული გართულებების გამოსარიცხად საჭირო გამოკვლევები.

ოპერაციის წინა პერიოდში აუცილებელია თამბაქოს მოხმარების და იმ პრეპარატების მიღების შეწყვეტა, რომლებიც ზრდიან სისხლდენის რისკს. ასევე მიიღება გადაწყვეტილება სხვა პრეპარატების ან საკვები დანამატების შესახებ, რომლებსაც პაციენტი ოპერაციამდე იღებდა.

ოპერაცია და პოსტოპერაციული პერიოდი

მკერდის გადიდების ოპერაცია პროფესიონალი პლასტიკური ქირურგების მიერ ზოგადი ანესთეზიით ტარდება და შესაბამისად უმტკივნეულოდ მიმდინარეობს. პროცედურა დაახლოებით 1-1.5სთ-ს გრძელდება.

Bქირურგი განაკვეთს ავლებს ძუძუს ქვემოთ, კანის ბუნებრივ ნაოჭში, რათა ჭრილობის კვალი ნაკლებ შესამჩნევი იყოს. თუმცა, საჭიროების შემთხვევაში, ჭრილობა შეიძლება გაკეთდეს არეოლას ან იღლიის არეში. პლასტიკური ქირურგი განსაზღვრავს ჭრილობის ადგილს და პაციენტს აცნობებს ოპერაციის დაწყებამდე.
შემდეგ ეტაპზე პლასტიკური ქირურგის მიერ მკერდსა და ნეკნთა რკალს შორის იქმნება ჯიბე, სადაც ხდება წინასწარ პაციენტთან ერთად შერჩეული იმპლანტის მოთავსება.
ჭრილობა იკერება და მკერდი იფარება მარლის საფენით. საჭიროების შემთხვევაში, ქირურგმა შეიძლება ჭრილობაში მოათავსოს დრენაჟი, რომლის ამოღება ხდება ოპერაციის შემდეგ პირველი კონსულტაციისას.

მკერდის გადიდებისთვის გამოიყენება ფიზიოლოგიური ან სილიკონის იმპლანტები. პაციენტთან ერთად განიხილება იმპლანტის ტიპი, ფორმა, ზომა და სხვა მახასიათებლები და შეირჩევა პაციენტისთვის ყველაზე შესაფერისი იმპლანტი.

ოპერაციის შემდეგ შეიძლება განვითარდეს ტკივილი, შეშუპება და სისხლჩაქცევები კანზე. ეს მოსალოდნელი სიმპტომებია, რომლებიც თავისთავად ალაგდება რამოდენიმე კვირაში.

ჭრილობის შედეგად წარმოქმნილი ნაწიბური დროთა განმავლობაში ფერმკრთალდება, თუმცა ვერასდროს დაუბრუნდება კანის ბუნებრივ ფერს.

ოპერაციის შემდეგ გარკვეული დროის მანძილზე საჭიროა კომპრესიული სახვევის და სპორტული ბიუსტჰალტერის ტარება. მინიმალური ტკივილის შემთხვევაშიც კი ქირურგი ნიშნავს ტკივილგამაყუჩებელ პრეპარატს. თუ ქირურგმა გამოიყენა არაშეწოვადი ნაკერები და მოათავსა დრენაჟი ჭრილობის არეში, ზედმეტი სითხის და/ან სისხლის დაგროვების გამოსარიცხად, იგი წინასწარ შეგატყობინებთ მათი ამოღების თარიღს (ჩვეულებრივ, პირველი პოსტოპერაციული ვიზიტის დროს). ძირითადად პაციენტი იმავე დღეს ეწერება საავადმყოფოდან, თუმცა ზოგჯერ შესაძლოა საჭირო გახდეს დაკვირვების ქვეშ ყოფნა.

ანესთეზიის ზემოქმედების გავლის შემდეგ პაციენტს შეუძლია დაიწყოს სიარული ექიმების მეთვალყურეობის ქვეშ.

საავადმყოფოდან გაწერამდე, პლასტიკური ქირურგი გასცემს რეკომენდაციას სარეაბილიტაციო პერიოდის ხანგრძლივობის შესახებ. ყოველდღიურ აქტივობებზე დაბრუნების შემდეგ, პაციენტმა გარკვეული დროის მანძილზე თავი უნდა შეიკავოს მძიმე სამუშაოს შესრულებისგან.

პოსტოპერაციული პერიოდის შემსუბუქებისა და საუკეთესო შედეგის მისაღებად მნიშვნელოვანია ექიმის მითითებების შესრულება. ამიტომ საავადმყოფოდან გაწერამდე მიზანშეწონილია პლასტიკურ ქირურგთან კონსულტაცია.
პლასტიკური ქირურგი განსაზღვრავს ასევე შემდგომი ვიზიტების გეგმას.
თუ გაწერის შემდეგ ჭრილობის არეში იგრძნობთ სიწითლეს ან სიმხურვალეს, ან შენიშნავთ ოპერაციასთან დაკავშირებულ სხვა რომელიმე სიმპტომს, დაუყოვნებლივ მიმართეთ თქვენს პლასტიკურ ქირურგს.

შედეგები

თუ მკერდის გადიდების ოპერაციამდე ქირურგს ნათლად აუხსნით თქვენს მიზნებსა და მოლოდინებს, მიიღებთ მაქსიმალურად ბუნებრივ და დამაკმაყოფილებელ შედეგს, მინიმუმამდე დაიყვანება განმეორებითი ოპერაციის რისკი. თუმცა, ყოველთვის უნდა გახსოვდეთ შემდეგი დეტალები მკერდის გადიდების ოპერაციის შესახებ:

მკერდის გადიდების ოპერაცია ვერ შეაჩერებს დაბერების ფიზიოლოგიურ პროცესს.
დაბერების ან წონის მატება/კლების შედეგად მკერდმა შეიძლება დაკარგოს ფორმა.
დროთა განმავლობაში იმპლანტები განიცდის ცვეთას და შესაძლოა საჭირო გახდეს მათი ახალი იმპლანტით ჩანაცვლება.
თუ მომავალში გეგმავთ ორსულობას, იმპლანტებმა შეიძლება გაართულოს ძუძუს წოვების პროცესი.
თუ შედეგი არადამაკმაყოფილებელია, შესაძლოა საჭირო გახდეს განმეორებითი პროცედურა.
შეიძლება წააწყდეთ სირთულეებს მამოგრაფიისა და სხვა გამოკვლევების დროს, რომელიც რეკომენდებულია ყველა ქალისთვის გარკვეული ასაკობრივი დიაპაზონის ფარგლებში, ან შეიძლება საჭირო გახდეს დამატებითი ტექნიკა და გამოკვლევები.