ღვიძლის გადანერგვა

ღვიძლის გადანერგვა არის ადამიანის დაზიანებული ან დაავადებული ღვიძლის ჩანაცვლება ჯანსაღი ღვიძლით. ღვიძლის გადანერგვა ხშირად განიხილება ღვიძლის მძიმე დაავადების მქონე პაციენტების მკურნალობის ვარიანტად. ღვიძლის ერთ-ერთი ყველაზე მნიშვნელოვანი ფუნქციაა ორგანიზმში მეტაბოლური პროცესების განხორციელება და ტოქსინების განეიტრალება. ღვიძლის დაზიანების შემთხვევაში ეს ფუნქციები შეიძლება დაირღვეს და ჯანმრთელობის სერიოზული პრობლემები წარმოიშვას. ამ შემთხვევაში შესაძლოა საჭირო გახდეს ღვიძლის გადანერგვა. ღვიძლის გადანერგვა ჩვეულებრივ ხორციელდება ქირურგიული გზით რა დროსაც ხდება დონორის ღვიძლის გადანერგვა პაციენტის სხეულში. ეს საკმაოდ რთული პროცედურაა. ჯერ საჭიროა გამოვლინდეს შესაფერისი კანდიდატები და მათგან შეირჩეს შესაბამისი დონორი.

რა შემთხვევებში არის საჭირო ღვიძლის გადანერგვა?

ღვიძლის გადანერგვა აუცილებელი ხდება ღვიძლის ფუნქციის სერიოზული დარღვევის დროს. ეს შეიძლება იყოს:
ღვიძლის ქრონიკული დაავადებები: ქრონიკული ჰეპატიტი, ციროზი, ღვიძლის ალკოჰოლური დაავადება, ღვიძლის კიბო და ღვიძლის მემკვიდრეობითი დაავადებები.

• ღვიძლის მწვავე უკმარისობა: ღვიძლი სწრაფად ზიანდება ტოქსინების ან მედიკამენტების გადაჭარბებული ზემოქმედების, ინფექციების ან სხვა მიზეზების გამო.

• პირველადი სკლეროზული ქოლანგიტი: ამ მდგომარეობაში ღვიძლის დაზიანება ხდება ნაღვლის სადინარებში ანთების გამო.

• ვილსონის დაავადება: ვილსონის დაავადება: ეს არის გენეტიკური დაავადება, რომლის დროსაც ხდება ღვიძლში სპილენძის დაგროვება, რაც იწვევს ღვიძლის დაზიანებას.

• ჰემოქრომატოზი: ეს არის გენეტიკური დაავადება, იწვევს ორგანიზმში რკინის ჭარბ დაგროვებას, რაც იწვევს ღვიძლის დაზიანებას.

• ღვიძლის ტრანსპლანტაცია ამ შემთხვევებში აუცილებელია პაციენტების სიცოცხლის გადასარჩენად ან მათი ცხოვრების ხარისხის გასაუმჯობესებლად.

რა მნიშვნელოვანი ფაქტორები არსებობს ღვიძლის ტრანსპლანტაციაში?

ღვიძლის გადანერგვა რთული ქირურგიული პროცედურაა, რომელშიც მთელი რიგი ფაქტორები უნდა იქნას გათვალისწინებული. ზოგიერთი მათგანია:

• დაავადების სიმძიმე: ღვიძლის დაავადების სიმძიმე განსაზღვრავს ღვიძლის გადანერგვის აუცილებლობას.

• სისხლის თავსებადობა: ტრანსპლანტაციის პროცესისთვის მნიშვნელოვანია რეციპიენტისა და დონორის სისხლის ჯგუფებისა და ანტიგენების თავსებადობა.

• დონორის წყაროები: მნიშვნელოვანია ასევე ღვიძლის ტრანსპლანტაციისთვის შესაფერისი დონორის პოვნა. ღვიძლის გადანერგვა შეიძლება განხორციელდეს ცოცხალი დონორისგან ან ტვინის სიკვდილის დაფიქირების შემდეგ.

• ზოგადი ჯანმრთელობის მდგომარეობა: უნდა შეფასდეს ასევე პაციენტის ზოგადი ჯანმრთელობის მდგომარეობა. მაგალითად, გულის, თირკმელების და ფილტვების პრობლემებმა შეიძლება გაართულოს გადანერგვის პროცედურა.

• იმუნოლოგიური თავსებადობა: ასევე გასათვალისწინებელია იმუნოლოგიური თავსებადობა, რადგან რეციპიენტის იმუნურმა სისტემამ შეიძლება გამოიწვიოს გადანერგილი ღვიძლის ,,უარყოფა’’.

• საავადმყოფოს გამოცდილება: მნიშვნელოვანია ასევე ღვიძლის ტრანსპლანტაციისთვის შესაფერისი კლინიკის შერჩევა. ტრანსპლანტაციის ცენტრის გამოცდილებამ და წარმატების ხარისხმა შეიძლება გავლენა მოახდინოს ტრანსპლანტაციის შემდგომ გართულებებზე და ჰოსპიტალიზაციის პერიოდის ხანგრძლივობაზე.

ყველა ეს ფაქტორი ფასდება ერთად და იგეგმება შესაბამისი ტრანსპლანტაციის პროცესი.