აბდომინოპლასტიკა

რეაბილიტაციის პერიოდი: 8დღე

ჰოსპიტალიზაციის პერიოდი: 2დღე

ოპერაციის ხანგრძლივობა: 2-4საათი

ანესთეზია: ზოგადი

სრული რეაბილიტაციის პერიოდი: 6თვე

აღწერა

აბდომინოპლასტიკა ქირურგიული პროცედურაა, რომლის დროსაც ხდება მუცლის ვიზუალის გაუმჯობესება. წონის მატება/კლება და გენეტიკური თავისებურებები მუცლის ფორმის ცვლილებას იწვევს. ვიზუალური დეფექტები შეიძლება გამოიწვიოს ორსულობამ, მუცლის კუნთების მოდუნებამ და კანის ტონუსის დაქვეითებამ.

როდესაც კანი კარგავს ელასტიურობას და ხდება მისი მოშვება, ზედმეტი კანისა და ცხიმის მოსაშორებლად მიმართავენ აბდომინოპლასტიკის პროცედურას.

აბდომინოპლასტიკა სხეულის საკორექციო ოპერაციებს შორის ყველაზე პოპულარული მეთოდია, რომელიც გამოიყენება მოშვებული კანის, სტრიების და დეფორმაციების კორექციისთვის. ამ ოპერაციის დროს მუცლის ქვედა ნაწილის მოშვებული კანის მოკვეთა და მუცლის კუნთების დაჭიმვა ხდება.

რატომ ტარდება აბდომინოპლასტიკის პროცედურა?

ზედმეტი ცხიმის დაგროვება პირველ რიგში მუცლის არეში მიმდინარეობს. დროთა განმავლობაში დაგროვილი ზედმეტი ცხიმი კანის ელასტიკურობის დაკარგვას და ზედმეტი კანის წარმოქმნას იწვევს. მუცლის კუნთები და შემაერთებელი ქსოვილი სუსტდება და იჭიმება. წონის მატება/კლების გარდა მუცლის კანზე, კუნთებსა და შემაერთებელ ქსოვილზე უარყოფითად მოქმედებს ორსულობაც. ამ პროცესების შედეგად მუცლის კანი განიცდის გრავიტაციის ზეგავლენას.

აბდომინოპლასტიკას ზედმეტი კანისა და დაგროვილი ცხიმის მოსაშორებლად მიმართავენ. ამრიგად მუცელი უფრო ესთეტიკურად გამოიყურება. ამავე დროს ხდება ორსულობისა და წონის მატება/კლების შედეგად წარმოქმნილი სტრიების და საკეისრო კვეთის შემდეგ დარჩენილი ნაწიბურების კორექცია.

აბდომინოპლასტიკა შესაძლებელია ჩატარდეს კომპლექსურად მკერდის გადიდების და აწევის(მასტოპექსია) ან ლიპოსაქციის მსგავს სხვა კოსმეტიკურ პროცედურებთან ერთად. ამ პროცედურებს მშობიარობის შემდეგ წონის მატების და ძუძუთი კვების შედეგად დაკარგული ფორმების აღსადგენად მიმართავენ.

ყველაზე ბუნებრივი და დამაკმაყოფილებელი შედეგის მისაღებად კონსულტაცია უნდა გაიაროთ პლასტიკურ ქირურგთან.

რისკები

სხვა ქირურგიული ოპეაციების მსგავსად გარკვეული რისკები ახლავს აბდომინოპლასტიკასაც. მიუხედავად მედიცინის განვითარებისა, რისკების 100%ით თავიდან აცილება შეუძლებელია. ამ პროცედურის დროს მნიშვნელოვანია პაციენტის სწორად შერჩევა. თუ მომავალში იგეგმება ორსულობა, მუცლის ნაწილში დაგროვილი ცხიმის მოცულობა ძალიან დიდია ან ჯანმრთელობის ზოგადი მდგომარეობა არადამაკმაყოფილებელია, მიზანშეწონილი არ არის აბდომინოპლასტიკის ჩატარება. ამ მდგომარეობების შეფასება უნდა მოხდეს ექიმის მიერ.

ქვემოთ ჩამოთვლილია აბდომინოპლასტიკის შესაძლო გართულებები:

• ჭრილობის ხაზის ქვემოთ სისხლდენა და ჰემატომა
• ინფექცია
• კელოიდური ნაწიბურის განვითარება
• ნაწიბურის არეში მგრძნობელობის დაქვეითება
• ჭრილობის არეში სითხის დაგროვება
• არადამაკმაყოფილებელი შედეგი
• ანესთეზიასთან დაკავშირებული გართულებები

პროფესიონალი ქირურგების გუნდი გართულებების შესამცირებლად მიმართავს სხვადასხვა ღონისძიებას, პლასტიკური ქირურგი კი ახდენს პაციენტის ინფორმირებას შესაძლო რისკების და გართულებების შესახებ და ეხმარება მას შიშის და სტრესის დაძლევაში.

მოსამზადებელი პერიოდი

ოპერაციის წინა მოსამზადებელი ეტაპი საერთოა მედიკანას ყველა საავადმყოფოსთვის. აბდომინოპლასტიკის ჩატარებაზე გადაწყვეტილების მიღების და პლასტიკურ ქირურგთან კონსულტაციის შემდეგ უნდა ჩატარდეს ქვემოთ ჩამოთვლილი გამოკვლევები:

• ჯანმრთელობის ისტორიის შესწავლა
• დეტალური ფიზიკური გამოკვლევა
• ლაბორატორიული ანალიზები და რადიოლოგიური გამოკვლევები
• ანესთეზიოლოგის კონსულტაცია და ანესთეზიასთან დაკავშირებული გართულებების გამოსარიცხად საჭირო გამოკვლევები.

ოპერაციის წინა პერიოდში აუცილებელია თამბაქოს მოხმარების და იმ პრეპარატების მიღების შეწყვეტა, რომლებიც ზრდიან სისხლდენის რისკს. ასევე მიიღება გადაწყვეტილება სხვა პრეპარატების ან საკვები დანამატების შესახებ, რომლებსაც პაციენტი ოპერაციამდე იღებდა.

ოპერაციამდე ძალიან მნიშვნელოვანია პლასტიკურ ქირურგთან გასაუბრება, რომელიც ოპერაციის შესახებ პაციენტის დეტალურ ინფორმირებას ახდენს. იგი პაციენტს აცნობს პროცედურის დეტალებს, პოტენციურ რისკებს და უყვება რეაბილიტაციის პერიოდის შესახებ.

პოსტოპერაციული პერიოდის სწორად მართვისთვის მნიშვნელოვანია წინასწარ დაიგეგმოს საავადმყოფოდან გაწერის შემდგომი ქმედებები.

ოპერაცია და ოპერაციის შემდგომი პერიოდი

აბდომინოპლასტიკა, პროფესიონალი პლასტიკური ქირურგების მიერ ზოგადი ანესთეზიით ტარდება და შესაბამისად უმტკივნეულოდ მიმდინარეობს. პროცედურა დაახლოებით 3სთ-ს გრძელდება.

სხვადასხვა ქირურგიული ტექნიკებიდან ქირურგი არჩევს პაციენტისთვის ყველაზე შესაფერის მეთოდს, რის შესახებაც წინასწარ ახდენს მის ინფორმირებას.

ხდება მუცლის ნაწილში დაგროვილი ზედმეტი კანისა და ცხიმის მოცილება, მუცლის კუნთებისა და ფასციების დაჭიმვა. ზედმეტი კანისა და ცხიმის მოცილების შედეგად შეიძლება შეიცვალოს ჭიპის მდებარეობა. ქირურგები მას უბრუნებენ საწყის მდებარეობას.

ჭრილობის გავლება ხდება მუცლის ბუნებრივ ნაკეცზე, რაც მას უხილავს ხდის. სისხლდენის თავიდან ასაცილებლად ჭრილობაში ათავსებენ მცირე დრენაჟებს. ჭრილობა დაფარულია სტერილური ბინტით. ნაკერების მოხსნის შესახებ გადაწყვეტილებას იღებს ქირურგი, რის შესახებაც წინასწარ ხდება პაციენტის ინფორმირება. შეიძლება გამოყენებულ იქნას გამწოვი ძაფები. ამ შემთხვევაში აღარ არის ნაკერების მოხსნის საჭიროება.

ანესთეზიის ზემოქმედებიდან გამოსვლის შემდეგ პაციენტს შეუძლია ფეხზე და ადგომა და სიარული ექიმების მეთვალყურეობის ქვეშ.

ოპერაციის შემდგომი ტკივილების შესამსუბუქებლად და ინფექციის გამოსარიცხად ინიშნება ტკივილგამაყუჩებელი პრეპარატები და ანტიბიოტიკები. ნელ-ნელა მცირდება ჭრილობის ირგვლივ შეშუპება. წარმოქმნილი ნაწიბურის ფერი ნელ-ნელა ღიავდება მაგრამ ვერასოდეს დაუბრუნდება კანის ბუნებრივ ფერს.

თუ ჭრილობის გასაკერად გამოყენებულია არაგამწოვი ძაფი და ჭრილობაში მოთავსებულია დრენაჟი, მათი მოხსნის შესახებ პაციენტის ინფორმირება ხდება ქირურგის მიერ, ძირითადად ოპერაციის შემდგომი პირველი კონსულტაციის დროს.

ჭრილობის მოვლის შესახებ ქირურგი პაციენტს აძლევს დეტალურ ინსტრუქციას. პლასტიკური ქირურგის მიერ განსაზღვრული დროის განმავლობაში, ნაკერების გახსნის თავიდან ასაცილებლად, პაციენტი უნდა მოერიდოს მძიმის აწევას და მკვეთრ მოძრაობებს.

აბდომინოპლასტიკის შემდეგ გარკვეული პერიოდის მანძილზე პაციენტმა უნდა ატაროს კორსეტი. ოპერაციის შედეგის შენარჩუნებისთვის ძალიან მნიშვნელოვანია პოსტოპერაციულ პერიოდში ქირურგის ყველა რეკომენდაციის შესრულება.

საავადმყოფოდან გაწერამდე პლასტიკური ქირურგი განსაზღვრავს შემდგომი ვიზიტების გეგმას. საავადმყოფოდან გაწერის შემდეგ, თუ იგრძნობთ ჭრილობის არეში სიწითლეს ან სიმხურვალეს, აღინიშნება ტემპერატურის მატება ან შენიშნავთ ოპერაციასთან დაკავშირებულ სხვა რომელიმე სიმპტომს, დაუყოვნებლივ მიმართეთ თქვენს პლასტიკურ ქირურგს.

შედეგები

აბდომინოპლასტიკის შემდეგ მუცლის არე მკვრივდება და უფრო ესთეტიკურად გამოიყურება. ექიმის მითითებების შესრულების და წონის გაკონტროლების შემთხვევაში, ოპერაციის შედეგი ნარჩუნდება ხანგრძლივი დროის მანძილზე.