ბლეფარობლასტიკა

ზოგადი მიმოხილვა

კანი, თვალის ირგვლივი კუნთები და ქსოვილები წარმოადგენს ფაქტორებს, რომლებიც პასუხისმგებელნი არიან ქუთუთოების ახალგაზრდულ იერზე. ასაკთან ერთად კანი კარგავს ელასტიურობას, სუსტდება კუნთები და დამხმარე ქსოვილები, რაც იწვევს ქუთუთოების დაშვებას და თვალების ქვეშ ,,ტომრების’’ წარმოაქმნას.
ეს სტრუქტურული ცვლილებები თვალებს ანიჭებს დაღლილ და ასაკიან გამომეტყველებას.
ბლეფაროპლასტიკა ჩვეულებრივ ტარდება კოსმეტიკური მიზნით. იგი წარმატებულ შედეგს იძლევა განსაკუთრებით ზედა ქუთუთოს პრობლემების მქონე პაციენტებში. პტოზის შორსწასულმა შემთხვევამ შეიძლება გამოიწვიოს მხედველობის პრობლემები.
ბლეფაროპლასტიკა არ არის გამოსავალი ქუთუთოების ქვეშ სიშავეების და ნაოჭების დროს. ოპერაცია ხშირად ტარდება კომბინირებულად სხვა პროცედურებთან, როგორიცაა კანის ზედაპირის ლაზერული აღდგენა, შემავსებლის ინექციები ან შუბლის ლიფტინგი.
ბლეფაროპლასტიკის ჩატარებაზე გადაწყვეტილების მიღების შემდეგ, კონსულტაცია უნდა გაიაროთ პლასტიკურ ქირურგთან ოპერაციის ტექნიკის, მოლოდინების, პოტენციური რისკების და უკუჩვენებების შესახებ.

რა დროს კეთდება ბლეფაროპლასტიკა?

დაბერების პროცესი იწვევს ქუთუთოების კანის ელასტიურობის დაკარგვას და კუნთებისა და დამხმარე ქსოვილების დასუსტებასთან ერთად, სიმძიმის ძალის გავლენით ქუთუთოები განიცდიან პტოზს. ამ დროს ზედა და ქვედა ქუთუთოებზე კანის დამატებითი ნაკეცები ვითარდება. ბლეფაროპლასტიკისთვის საუკეთესო კანდიდატები არიან პაციენტები, რომლებსაც აქვთ კარგი ჯანმრთელობა და რეალისტური მოლოდინები. ამ ოპერაციას ძირითადად მიმართავენ საშუალო ასაკის და ხანდაზმული ადამიანები. თუმცა, სამედიცინო ჩვენებების გამო, მისი ჩატარება შესაძლებელია ახალგაზრდა ასაკშიც. თვალების იერსახის გაუმჯობესებით, ბლეფაროპლასტიკა ქალს მატებს თავდაჯერებულობას.

მიუხედავად იმისა, რომ ზედა ქუთუთოებზე ოპერაციის შედეგი ხანგრძლივად ნარჩუნდება, ასაკის მატებასთან ერთად შეიძლება განვითარდეს განმეორებითი პტოზი. ამავე დროს იშვიათად დგება ქვედა ქუთუთოს განმეორებით ოპერაციის საჭიროება. ყველაზე ბუნებრივი და დამაკმაყოფილებელი შედეგის მისაღებად, თქვენს მიზნებსა და მოლოდინებზე უნდა გაესაუბროთ პლასტიკურ ქირურგს.

რისკები

ბლეფაროპლასტიკის შესაძლო გართულებები:
- სისხლდენა
- ინფექცია
- თვალის სიმშრალე
- ქუთუთოს ფერის ცვლილება ან კელოიდური ნაწიბური
- თვალების დახუჭვის გაძნელება
- მხედველობის პრობლემები
- ანესთეზიასთან დაკავშირებული გართულებები

მართალია, მედიცინის განვითარების მიუხედავად, რისკების 100%-ით თავიდან აცილება შეუძლებელია, მაგრამ შესაძლებელია მათი პროფილაქტიკა. პროფესიონალი პლასტიკური ქირურგების გუნდი მიმართავს ყველა ზომას გართულებების რისკის მინიმუმამდე შესამცირებლად. ისინი ოპერაციის დაწყებამდე პაციენტს აწვდიან ინფორმაციას ზემოთ ჩამოთვლილი პოტენციური რისკებისა და გართულებების შესახებ და ეხმარებიან მას შიშისა და სტრესის დაძლევაში.

მოსამზადებელი პერიოდი

მოსამზადებელი პერიოდი მედიკანას ყველა საავადმყოფოსთვის საერთოა.
ბლეფაროპლასტიკის ჩატარებაზე გადაწყვეტილების მიღების და პლასტიკურ ქირურგთან კონსულტაციის შემდეგ უნდა ჩატარდეს ქვემოთ ჩამოთვლილი გამოკვლევები:
•    ჯანმრთელობის ისტორიის შესწავლა
•    დეტალური ფიზიკური გამოკვლევა
•    ლაბორატორიული ანალიზები და რადიოლოგიური გამოკვლევები
•    ანესთეზიოლოგის კონსულტაცია და ანესთეზიასთან დაკავშირებული გართულებების გამოსარიცხად საჭირო გამოკვლევები.
ოპერაციის წინა პერიოდში აუცილებელია თამბაქოს მოხმარების და იმ პრეპარატების მიღების შეწყვეტა, რომლებიც ზრდიან სისხლდენის რისკს. ასევე მიიღება გადაწყვეტილება სხვა პრეპარატების ან საკვები დანამატების შესახებ, რომლებსაც პაციენტი ოპერაციამდე იღებდა.
გარდა ამისა ოპერაციამდე გარკვეული დროით ადრე პაციენტმა უნდა შეწყვიტოს საკვების და სასმლის მიღება, რის შესახებაც მას წინასწარ მიეწოდება ინფორმაცია.
ბლეფაროპლასტიკის შემდეგ რეკომენდირებულია პაციენტს გვერდით ყავდეს თავმდგმური. ოპერაციიდან რამდენიმე დღის განმავლობაში საჭიროა სოციალური აქტივობების შეზღუდვა. გარდა ამისა, ძალზე მნიშვნელოვანია, რომ არ მოისრისოთ თვალები, მოერიდოთ მძიმე სამუშაოს შესრულებას და ცურვას, თვალებზე დაიდოთ ცივი კომპრესები და მიჰყვეთ ექიმის სხვა მითითებებს.
ზოგიერთ პაციენტს ოპერაციის შემდეგ აღენიშნება თვალის სიმშრალე, რომელიც მაქსიმუმ ორ კვირას გრძელდება. თუ თვალის სიმშრალე უფრო გახანგრძლივდა, უნდა მიმართოთ ექიმს.
პოსტოპერაციული პერიოდის სწორად წარმართვისთვის მნიშვნელოვანია წინასწარ დაიგეგმოს საავადმყოფოდან გაწერის შემდეგ საჭირო ქმედებები.
თუ ოპერაცია ზედა და ქვედა ქუთუთოზე ერთდროულად კეთდება, პროცედურას შეიძლება დასჭირდეს დაახლოებით 2 საათი. ოპერაცია ტარდება ადგილობრივი ანესთეზიით და სედაციით. პლასტიკური ქირურგი განაკვეთს ავლებს კანის ბუნებრივ ნაკეცში, რაც მას შეუმჩნეველს ხდის. ოპერაციის დროს ჭარბი კანისა და ცხიმის მოცილების შემდეგ, მაღალი ესთეტიკური შედეგის მისაღებად ჭრილობაზე ადებენ მცირე კოსმეტიკურ ნაკერს. ზედა ქუთუთოს ნაკერს ხსნიან დაახლოებით ერთი კვირის შემდეგ. ქვედა ქუთუთოს, გამოყენებული ტექნიკის მიხედვით შეიძლება ნაკერი არ დასჭირდეს.
პროცედურის შემდეგ ექიმმა შეიძლება გირჩიოთ კანის ზედაპირის ლაზერული აღდგენა. ოპერაციის შემდეგ ჭრილობის არეში შესაძლოა აღინიშნოს ტკივილი, შეშუპება და სისხლჩაქცევები. ეს სიმპტომები ნორმალურია და თავისთავად გაივლის რამოდენიმე კვირის განმავლობაში. ჭრილობის ადგილას წარმოქმნილი ნაწიბური დროთა განმავლობაში ფერმკრთალდება, თუმცა ვერასდროს დაუბრუნდება კანის ბუნებრივ ფერს.
ანესთეზიის ზემოქმედებიდან გამოსვლის შემდეგ პაციენტს შეუძლია ფეხზე ადგომა და სიარული ექიმების მეთვალყურეობის ქვეშ.
საავადმყოფოდან გაწერამდე, პლასტიკური ქირურგი გასცემს რეკომენდაციას სარეაბილიტაციო პერიოდის ხანგრძლივობის და შესასრულებელი მსუბუქი ვარჯიშების შესახებ. გარკვეული დროის მანძილზე პაციენტმა თავი უნდა აარიდოს მძიმე სამუშაოს შესრულებას.პოსტოპერაციული პერიოდის შემსუბუქებისა და საუკეთესო შედეგის მისაღებად უაღრესად მნიშვნელოვანია ექიმის მითითებების შესრულება. ამიტომ საავადმყოფოდან გაწერამდე მიზანშეწონილია გაესაუბროთ პლასტიკურ ქირურგს. საავადმყოფოდან გაწერის შემდეგ, თუ ჭრილობის არეში იგრძნობთ სიწითლეს ან სიმხურვალეს, ან შენიშნავთ ოპერაციასთან დაკავშირებულ სხვა რომელიმე სიმპტომს, დაუყოვნებლივ მიმართეთ თქვენს პლასტიკურ ქირურგს.

შედეგები

ბლეფაროპლასტიკის შემდეგ თვალები და თვალის გარშემო არე უფრო ახალგაზრდულად და ჯანსაღად გამოიყურება. უდაოა, რომ ეს ქალს მატებს თავდაჯერებულობას. ოპერაციის შემდეგ საბოლოო შედეგის დადგომას შეიძლება დასჭირდეს რამოდენიმე კვირა. მიუხედავად იმისა, რომ პროცედურის ეფექტი ხანგრძლივად ნარჩუნდება, იგი ვერ შეაჩერებს დაბერების ფიზიოლოგიურ პროცესს. სასურველია გაესაუბროთ პლასტიკურ ქირურგს იმ პრევენციული ზომების შესახებ, რომელიც საჭიროა კოსმეტიკური ეფექტის გასახანგრძლივებლად.