სახის ლიფტინგი

ზოგადი მიმოხილვა

სახის ლიფტინგი არის ქირურგიული პროცედურა, რომლის მიზანია დაბერების შედეგად სახესა და კისერზე წარმოქმნილი კოსმეტიკური პრობლემების გამოსწორება. თუ თვლით, რომ თქვენს სახეს დაღლილი და ასაკიანი შეხედულება აქვს, ან შენიშნეთ პტოზის განვითარება, შეგიძლიათ მიმართოთ სახის ლიფტინგის პროცედურას. ოპერაციის დროს ხდება სახის ზედმეტი კანის მოცილება და დამხმარე ქსოვილების აღდგენა, მაგრამ იგი ვერ გამოასწორებს სახის სხვა ნაკლოვანებებებს (შუბლის ხაზები, თვალების ქვეშ ნაოჭები და ა.შ.) ან კანის სტრუქტურას. სახის უფრო ბუნებრივი და ახალგაზრდული იერის მისაღწევად ქირურგმა შესაძლოა გირჩოთ თვალის ქვედა არეს, თვალის, წარბების, ცხვირის, ტუჩების, ლოყების, ნიკაპისა და კისრის დამატებითი პროცედურების ჩატარება.

რა დროს ტარდება სახის ლიფტინგი?

დაბერების და გარემო ფაქტორების ზემოქმედების შედეგად სახის კანი კარგავს ელასტიურობას, დროთა განმავლობაში ვითარდება პტოზი და სახის ვიზუალი იცვლება. როდესაც ამ ფაქტორებს გრავიტაციის ზეგავლენა ემატება, თვალების ქვეშ წარმოიქმნება ტომრები და სახის კანი და კანქვეშა ქსოვილი ყბის ხაზისკენ იწყებს დაშვებას. დროთა განმავლობაში ამ პროცესებს ქუთუთოების და კისრის კანის ცვლილებებიც ემატება. შედეგად სახე იღებს ასაკოვან და დაღლილ იერს.

სახის ლიფტინგის ოპერაცია მიზნად ისახავს შემდეგი პრობლემების მოგვარებას:

• სახის შუა მესამედის კანი ელასტიურობის დაკარგვის შედეგად განიცდის პტოზს.
• თვალებს ქვემოთ შეინიშნება ტომრები და ღრმა ნაოჭები.
• კანის დაშვების და კანქვეშა ცხიმოვანი ქსოვილის გადაადგილების გამო ლოყები ჩავარდნილია.
• მოშვებულია კისრის კანი.

თუ ტარდება მთელი სახის ლიფტინგი, სხვა პრობლემების გამოსასწორებლად და სრულყოფილი შედეგის მისაღებად პლასტიკურ ქირურგთან ერთად უნდა განიხილოთ და დაგეგმოთ სხვა კოსმეტიკური პროცედურებიც.

რისკები

სახის ლიფტინგის ოპერაციის გართულებები ძალზე იშვიათია.
თანამედროვე მედიცინის შესაძლებლობების მიუხედავად, რისკების ასი პროცენტით თავიდან აცილება შეუძლებელია.
•    სისხლდენა
•    ინფექცია
•    კელოიდური ნაწიბური
•    კანის ქსოვილის დანაკარგი
•    ასიმეტრია
•    სახის ნერვის დაზიანება
•    დაბუჟება და მგრძნობელობის სხვა ცვლილებები
•    არადამაკმაყოფილებელი შედეგი
•    ანესთეზიასთან დაკავშირებული გართულებები
•    ჭრილობის არეში თმის ცვენა

პროფესიონალთა გუნდი მიმართავს ყველა ზომას გართულებების რისკის მინიმუმამდე შესამცირებლად. ისინი ოპერაციის დაწყებამდე პაციენტს აწვდიან ინფორმაციას ზემოთ ჩამოთვლილი პოტენციური რისკებისა და გართულებების შესახებ და ეხმარებიან მას შიშისა და სტრესის დაძლევაში.

მოსამზადებელი პერიოდი

მოსამზადებელი პერიოდი მედიკანას ყველა საავადმყოფოსთვის საერთოა. სახის ლიფტინგის ჩატარებაზე გადაწყვეტილების მიღების და პლასტიკურ ქირურგთან კონსულტაციის შემდეგ უნდა ჩატარდეს ქვემოთ ჩამოთვლილი გამოკვლევები:
•    ჯანმრთელობის ისტორიის შესწავლა
•    დეტალური ფიზიკური გამოკვლევა
•    ლაბორატორიული ანალიზები და რადიოლოგიური გამოკვლევები
•    ანესთეზიოლოგის კონსულტაცია და ანესთეზიასთან დაკავშირებული გართულებების გამოსარიცხად საჭირო გამოკვლევები.

რისკების გამორიცხვის შემდეგ, ოპერაციის წინა პერიოდში აუცილებელია თამბაქოს მოხმარების და იმ პრეპარატების მიღების შეწყვეტა, რომლებიც ზრდიან სისხლდენის რისკს. ასევე მიიღება გადაწყვეტილება სხვა პრეპარატების ან საკვები დანამატების შესახებ, რომლებსაც პაციენტი ოპერაციამდე იღებდა.

ოპერაციამდე ძალიან მნიშვნელოვანია პლასტიკურ ქირურგთან გასაუბრება, რომელიც ოპერაციის შესახებ პაციენტის დეტალურ ინფორმირებას ახდენს. იგი პაციენტს აცნობს პროცედურის დეტალებს, პოტენციურ რისკებს და უყვება რეაბილიტაციის პერიოდის შესახებ.

გარდა ამისა ოპერაციამდე გარკვეული დროით ადრე პაციენტმა უნდა შეწყვიტოს საკვების და სასმლის მიღება, რის შესახებაც მას წინასწარ მიეწოდება ინფორმაცია.

პოსტოპერაციული პერიოდის სწორად მართვისთვის მნიშვნელოვანია წინასწარ დაიგეგმოს საავადმყოფოდან გაწერის შემდგომი ქმედებები.

ოპერაცია და ოპერაციის შემდგომი პერიოდი

სახის ლიფტინგის პროცედურა ზოგადი ანესთეზიით, სედაციისა და ლოკალური ანესთეზიის კომბინაციით ან მხოლოდ ლოკალური ანესთეზიით მიმდინარეობს.
არსებობს სახის ლიფტინგის სხვადასხვა ქირურგიული ტექნიკა. პლასტიკური ქირურგი მდგომარეობის სიმძიმის და პაციენტის მოლოდინების მიხედვით ადგენს ყველაზე შესაფერის მეთოდს საუკეთესო შედეგის მისაღწევად. ამ ტექნიკების დეტალების, უპირატესობების, რისკებისა და მოსალოდნელი შედეგების შესახებ მოხდება პაციენტის წინასწარ ინფორმირება.

პრობლემის სირთულის მიხედვით ოპერაცია გრძელდება 3-6საათამდე. ჭარბი კანის მოცილების შემდეგ ხდება კანქვეშა ქსოვილების ფორმირება. საჭიროების შემთხევაში სხეულის სხვა მონაკვეთიდან აღებული ცხიმით ხდება იმ ადგილების შევსება, სადაც გამოხატულია კანქვეშა ცხიმის განლევა. ბოლო ეტაპზე ჭრილობა იხურება ნაკერით და იფარება სტერილური ბინტით.

ოპერაციის დასრულებამდე სისხლისა და გამონაჟონი ლიმფის დაგროვების თავიდან ასაცილებლად ჭრილობაში ხდება დრენაჟის მოთავსება.

პლასტიკური ქირურგი პაციენტს აფრთხილებს საავადმყოფოში დარჩენისა და დაკვირვების ქვეშ ყოფნის საჭიროებასთან დაკავშირებით.

ანესთეზიის ზემოქმედებიდან გამოსვლის შემდეგ პაციენტს შეუძლია ფეხზე ადგომა და სიარული ექიმების მეთვალყურეობის ქვეშ.ოპერაციის შემდგომი შეშუპება და სისხლჩაქცევები თავისთავად გაივლის რამოდენიმე დღეში. ტკივილის შემთხვევაში ქირურგი ნიშნავს ტკივილგამაყუჩებელ საშუალებას.

პლასტიკური ქირურგი, ოპერაციის მეორე დღეს პაციენტს იბარებს საავადმყოფოში ვიზიტზე, რა დროსაც ხდება დრენაჟის ამოღება. იგი ასევე განსაზღვრავს ნაკერების მოხსნის თარიღს.

ოპერაციის შემდეგ, ყურადღება უნდა მიაქციოთ ჯდომისა და წოლის მანერას, რაც დაეხმარება შეხორცების პროცესს. მნიშვნელოვანია ექიმთან შემდგომ გეგმიურ ვიზიტებზე სიარული. ამ დროს ექიმი აფასებს შეხორცების პროცესს. ინფექციის ან ანთებითი პროცესის აღმოჩენის შემთხვევაში იწყება შესაბამისი მკურნალობა.

ჭრილობის კვალი დროთა განმავლობაში ფერმკრთალდება, მაგრამ ვერასოდეს დაუბრუნდება კანის ბუნებრივ ფერს. ჭრილობები ნელ-ნელა ხორცდება, გაივლის შეშუპება და ნათელი გახდება ოპერაციის საბოლოო შედეგი. აღდგენის პროცესი და სოციალურ აქტივობებში ჩართვის ვადები განსხვავდება პაციენტის ასაკისა და გამოყენებული ტექნიკის მიხედვით. ოპერაციიდან ერთი კვირის შემდეგ უმიშვნელო სისხლჩაქცევების დაფარვას ქალბატონები მაკიაჟით ახერხებენ. სახის ბუნებრივი იერის დაბრუნებას შეიძლება 2-3 კვირა დასჭირდეს.

უმოკლეს დროში საუკეთესო შედეგის მისაღწევად, რეაბილიტაციის პერიოდის განმავლობაში მკაცრად უნდა მიჰყვეთ ექიმის მითითებებს (ჭრილობის მოვლა, მზის ზემოქმედების და მძიმე ფიზიკური სამუშაოს თავიდან აცილება, სახის ტრავმისგან დაცვა, ჰიგიენა, მაკიაჟი და ა.შ.). ამიტომ, საავადმყოფოდან გასვლამდე თქვენთვის ყველა საინტერესო საკითხზე გაესაუბრეთ ექიმს.

თუ გაწერის შემდეგ ჭრილობის არეში იგრძნობთ სიწითლეს ან სიმხურვალეს, ან შენიშნავთ ოპერაციასთან დაკავშირებულ სხვა რომელიმე სიმპტომს, დაუყოვნებლივ მიმართეთ თქვენს პლასტიკურ ქირურგს.

შედეგები

ოპერააციის შემდეგ სახისა და კისრის კანი იძენს სიმკვრივეს და უფრო ახალგაზრდულად გამოიყურება. შეშუპება ნელ-ნელა იკლებს და ჭრილობის კვალიც ფერმკრთალდება. ოპერაციის შედეგი ნათლად ჩანს 2-3 კვირის შემდეგ, თუმცა სრულ რეაბილიტაციას 6თვე სჭირდება.

სახის ლიფტინგის ოპერაცია ხელს უწყობს სახის გაახალგაზრდავებას, მაგრამ ის ვერ გამოასწორებს სახის სხვა კოსმეტიკურ დეფექტებს და ვერ შეცვლის კანის სტრუქტურას. ამიტომ, თუ გაწუხებთ კანის სხვა კოსმეტიკური პრობლემებიც, მათგან თავის დასაღწევად სახის ლიფტინგის ოპერაციასთან ერთად სხვა კოსმეტიკურ პროცედურებსაც უნდა მიმართოთ.

თუ სახის ლიფტინგის ოპერაციამდე ქირურგს ნათლად მოუყვებით თქვენი მიზნებისა და მოლოდინების შესახებ, მიიღებთ მაქსიმალურად ბუნებრივ და დამაკმაყოფილებელ შედეგს.

ეს ოპერაცია ვერ შეაჩერებს დაბერების პროცესს. ამიტომ შედეგის გასახანგრძლივებლად სახე უნდა დაიცვათ მზის სხივებისა და სხვა გარემო ფაქტორებისგან და მიყვეთ პლასტიკური ქირურგის რჩევებს.