ჰიპერჰიდროზი

ჰიპერჰიდროზი (ჭარბი ოფლიანობა)

ოფლიანობა ორგანიზმის ფიზიოლოგიური ფუნქციაა, რომელიც არეგულირებს სხეულის ტემპერატურას. ის ასევე ხელს უწყობს ორგანიზმში წარმოქმნილი ტოქსინების გამოდევნას. ცხელ ამინდში სხეულის ტემპერატურის დარეგულირების მიზნით ოფლიანობა იზრდება. ჭარბი ოფლიანობა შეიძლება შეინიშნოს ვარჯიშის, მღელვარებისა და სტრესის დროს.

ზოგიერთი ადამიანისთვის ოფლიანობა სერიოზულ პრობლემას წარმოადგენს. ჭარბი ოფლიანობა, ფიზიკური აქტივობის გარეშე, ჰაერის ტემპერატურის მიუხედავად ვლინდება სხეულის გარკვეულ ნაწილებში, განსაკუთრებით ხელების, იღლიების და ტერფების მიდამოში. ჰიპერჰიდროზის გავრცელება თურქეთში დაახლოებით 1%-ია.
ოფლიანობა, რომელსაც თან ახლავს თავბრუსხვევა, გულისრევა ან ტკივილი გულმკერდში, მიუთითებს ჯანმრთელობის მნიშვნელოვან პრობლემაზე და საჭიროებს ექიმთან ვიზიტს.

ჰიპერჰიდროზი არის ორი სახის: პირველადი და მეორადი. პირველადი ჰიპერჰიდროზის დროს უცნობია ჭარბი ოფლიანობის გამომწვევი მიზეზი. იგი უკავშირდება ნერვული სისტემის გადაჭარბებულ მოქმედებას. ფაქტორებმა, რომლებიც იწვევენ ოფლიანობას ნორმალურ პირობებში, შეიძლება გააუარესოს მდგომარეობა.

როგორც წესი, ჭარბი ოფლიანობა შეინიშნება ხელების, ტერფების, სახის, იღლიების და გულმკერდის წინა მიდამოში. მეორად ჰიპერჰიდროზს ჩვეულებრივ სამედიცინო პრობლემები იწვევს და ყველაზე ხშირად ვითარდება დიაბეტის, მენოპაუზის, გულის შეტევის, კიბოს, ინფექციის და ნერვული სისტემის დარღვევების გამო.

პირველადი ჰიპერჰიდროზი მნიშვნელოვანი მდგომარეობაა, რომელიც მძიმე ტვირთად აწვება ადამიანის სოციალურ ცხოვრებას. როგორც პირველადი, ისე მეორადი ჰიპერჰიდროზის ძირეული მიზეზის იდენტიფიცირება საკვანძო დიაგნოსტიკური მიდგომაა. საბოლოო დიაგნოზს შეიძლება დასჭირდეს გამოსახულებითი კვლევები სისხლის და შარდის ანალიზებთან ერთად. პირველადი ჰიპერჰიდროზის შემთხვევაში ეტიოლოგიის დადგენის გარეშე დიაგნოზის დასმა შესაძლებელია. მეორადი ჰიპერჰიდროზის დროს კი მთავარი მიზანია ძირითადი გამომწვევი მიზეზის მკურნალობა.

პირველადი ჰიპერჰიდროზის სამკურნალოდ გამოიყენება კრემები, გელები ან სპრეი. თერაპიული ეფექტის გასაძლიერებლად ისინი გამოყენებულ უნდა იქნას მაღალი დოზებით რამდენიმე დღის განმავლობაში. დროთა განმავლობაში, თერაპიული ეფექტი შეიძლება შემცირდეს და გამოიხატოს კანის გაღიზიანება.

იონოფორეზი: ეს არის მკურნალობის მეთოდი დაბალი ძაბვის ელექტრული დენით. მისი გამოყენება შესაძლებელია ხელებისა და ტერფების ჭარბი ოფლიანობის დროს. ეს ძვირადღირებული მეთოდი მოითხოვს სპეციალურ აღჭურვილობას და ძალიან შრომატევადია. მისი გამოყენება არ შეიძლება ლითონის პროთეზებისა და კარდიოსტიმულატორების მქონე ადამიანებში.

ბოტოქსის ინექცია

ბოტოქსის ინექცია ჰიპერჰიდროზის მკურნალობის ერთ-ერთი ყველაზე გავრცელებული მეთოდია. მისი მიზანია ტოქსინის ლოკალური ინექციით სიმპათიკური ნერვების პარალიზება და საოფლე ჯირკვლების ფუნქციის გათიშვა. ეფექტი ნარჩუნდება 6 თვის განმავლობაში. ამიტომ პროცედურა უნდა გამეორდეს 6თვიანი ინტერვალით.

ქირურგიული მეთოდი

ჰიპერჰიდროზის მკურნალობის რადიკალური მეთოდია ქირურგიული მკურნალობა. ერთ-ერთი მეთოდია ქირურგიული ჩარევის შედეგად საოფლე ჯირკვლების მექანიკური გზით დარღვევა. თუმცა, ბოლო დროს ეს მეთოდი ნაკლებად გამოიყენება.

მსოფლიოში აღიარებული მეთოდია სიმპათიკურ ნერვზე კლიფსის დადება, მკურნალობის ეს მეთოდი გვთავაზობს მუდმივ გამოსავალს. პროცედურას ეწოდება გულმკერდის ენდოსკოპიური სიმპატექტომია (ETS). ოპერაცია ტარდება ზოგადი ანესთეზიის ქვეშ.

საოპერაციო მხარეს კეთდება ორი მცირე (1სმ) განაკვეთი, სპეციალური კამერის საშუალებით ოპერაციის მსვლელობას აკვირდებიან ეკრანზე. ხდება სიმპათიკური ნერვული ღეროს შესაბამის სეგმენტზე კლიფსის დადება. პროცედურა გრძელდება 30-60 წთ. პაციენტის გაწერა ხდება ოპერაციის მე-2 დღეს. მათ შეუძლიათ დაუბრუნდნენ სამსახურს და ყოველდღიურ საქმიანობას 1კვირის შემდეგ.

ჰიპერჰიდროზი არის დაავადება, რომელსაც არ უნდა დანებდეთ. თითოეულ პაციენტს შეუძლია ეწვიოს ექიმს, აირჩიოს მკურნალობის ყველაზე შესაფერისი ვარიანტი და თავი დააღწიოს ამ პრობლემას.